Trump “bllokon” robotët e rinj humanoide nga Kina: Rrezikohet siguria kombëtare!

Administrata e presidentit Donald Trump ka njoftuar ndalimin e importit në Shtetet e Bashkuara të robotëve të rinj humanoidë dhe sistemeve të avancuara robotike të prodhuara jashtë vendit, duke argumentuar se ato paraqesin “rreziqe të papranueshme” për sigurinë kombëtare.

Në të njëjtën kohë, Komisioni Federal i Komunikimeve (FCC) ka ndaluar edhe importin e invertorëve të energjisë, pajisje të përdorura në qendrat e të dhënave dhe sistemet e paneleve diellore, pasi sipas autoriteteve amerikane ato mund të përbëjnë një rrezik për ekonominë dhe infrastrukturën kritike të vendit.

Megjithatë, ndalimi nuk prek modelet ekzistuese që janë miratuar më parë nga FCC dhe që tashmë qarkullojnë në tregun amerikan.

Po ashtu, autoritetet amerikane paralajmërojnë se robotët humanoidë të prodhuar jashtë vendit mund të përdoren për spiunazh, mbledhje informacioni ose kontroll në distancë nga aktorë të huaj.

Nga ana tjetër, Ambasada e Kinës në Uashington reagoi duke akuzuar SHBA-në për politizim të çështjeve tregtare dhe teknologjike. Pekini i cilësoi akuzat si “pretekste të pabaza” dhe paralajmëroi se do të marrë “të gjitha masat e nevojshme” për të mbrojtur interesat e tij.

Qeveria kineze u bëri gjithashtu thirrje Shteteve të Bashkuara të heqin dorë nga “mentaliteti hegjemonik” dhe të mos vendosin sanksione ndaj kompanive kineze, duke theksuar se zhvillimi i inteligjencës artificiale në Kinë është rezultat i investimeve dhe bashkëpunimit ndërkombëtar.

Masat e reja janë pjesë e strategjisë së administratës Trump për të kufizuar varësinë nga teknologjitë kineze. Vitet e fundit, Uashingtoni ka vendosur kufizime edhe për eksportin e gjysmëpërçuesve të avancuar drejt Kinës dhe ka paralajmëruar sanksione ndaj kompanive kineze të inteligjencës artificiale, të cilat akuzohen për përvetësim të pronës intelektuale amerikane.

Ndërkohë, kompanitë kineze kanë përshpejtuar zhvillimin e robotëve humanoidë për përdorim në industri dhe në shtëpi, duke konkurruar drejtpërdrejt me gjigantët amerikanë të teknologjisë si Tesla dhe Boston Dynamics.