Tiranë, punime në Unazën e Madhe, ARRSH njofton ndryshimin e lëvizjes së makinave për 2 muaj

Autoriteti Rrugor Shqiptar bëri të ditur të enjten se, në kuadër të zbatimit të projektit në Unazën e Madhe, duke filluar nga dita e diel, datë 23.04.2023, për një periudhë dymujore, do të ndryshojë drejtimi i lëvizjes së makinave.

Të gjitha automjetet që vijnë nga Mbikalimi i Pallatit me Shigjeta, aksi kryesor, në drejtim të Astirit, do të devijojnë majtas, ndërsa ato që kanë destinacion Qendrën, Laprakën, Astirin, do të marrin daljen e autostradës pa u futur në nënkalimin e Astirit.

“Automjetet që kanë destinacion Durrësin dhe Aeroportin do të vazhdojnë drejt përgjatë unazës. Ndërsa automjetet që vijnë nga kryqëzimi i Astirit (rruga dytësore) në drejtim të Pallatit me Shigjeta dhe që kanë destinacion Elbasanin, do të marrin daljen për në rrugën kryesore sipas sinjalistikës që do të vendoset. Sa i përket makinave që vijnë nga aksi kryesor nuk do të kenë ndryshim lëvizjeje”- thuhet në njoftim.

Autoriteti Rrugor Shqiptar deklaron se ka marrë të gjitha masat për kufizimin e kantierit ku do të kryhen punimet, si dhe vendosjen e sinjalistikës provizore për të orientuar përdoruesit e rrugës.

ARRSH, me këtë rast, kërkon mirëkuptimin e banorëve dhe të përdoruesve të rrugës për këto ndërhyrje që po kryhen në këtë aks, deri në përfundimin e plotë të këtij projekti.