SHBA-të do të revokojnë vizat për azilkërkuesit

Administrata e Presidentit Donald Trump tha se planifikonte të revokonte vizat joemigruese të të huajve që kanë aplikuar për statusin e azilit në Shtetet e Bashkuara.

Reuters raporton se një zëdhënës i Departamentit të Shtetit tha se po koordinohej me Departamentin e Sigurisë Kombëtare “për të identifikuar dhe revokuar vizat joemigruese të të huajve që kanë ardhur në Shtetet e Bashkuara duke pretenduar se janë vizitorë afatshkurtër, por më pas aplikojnë për azil për të qëndruar përgjithmonë”.

Në raportin e Associated Press thuhet se Departamenti i Shtetit do të revokojë të ashtuquajturat viza B1 dhe B2 të lëshuara midis viteve 2016 dhe 2026, mbajtësit e të cilave kanë kërkuar azil ose tani po kërkojnë azil. Vizat joemigruese B1 dhe B2 lëshohen për udhëtime biznesi dhe turistike.

Departamenti i Shtetit tha më parë këtë muaj se, nën administratën Trump, ka revokuar më shumë se 175 mijë viza të shtetasve të huaj. Ndërkaq, masat e ashpra të qeverisë janë përballur me sfida ligjore.