Schengen nën presion, 10 vende rikthejnë kontrollet në kufij

Italia ka vendosur të zgjasë edhe me 15 ditë kontrollet në kufijtë ajrorë dhe detarë me Spanjën, një masë që ka shkaktuar edhe reagimin e Madridit.

Vendimi i Romës i është njoftuar Komisionit Evropian, i cili pritet ta shqyrtojë, por burime nga BE-ja bëjnë të ditur se Brukseli nuk pritet të kundërshtojë publikisht masën.

Komisioni Evropian kishte kërkuar në qershor që këto kontrolle të hiqeshin gradualisht dhe të zëvendësoheshin me masa alternative. Megjithatë, vetëm Sllovenia e ka ndjekur këtë kërkesë.

Edhe Italia ishte kritikuar më herët nga Brukseli për kontrollet në kufirin me Slloveninë. Pavarësisht kësaj, Roma i ka zgjatur masat deri më 18 dhjetor.

Rasti i Spanjës është veçanërisht i debatueshëm, pasi sipas burimeve evropiane nuk ka prova se migrantët që mbërrijnë në Ceuta po përdorin territorin spanjoll për të kaluar më pas drejt Italisë përmes zonës Schengen.

“Duhet të shpresojmë që kjo zgjatje të jetë e fundit”, është shprehur një zyrtar i BE-së.

Përballë rikthimit të kontrolleve nga një numër gjithnjë e më i madh shtetesh, Komisioni Evropian po has vështirësi për të kundërshtuar masat e qeverive kombëtare.