Mori dhuratë 5 mln paund/ Nigel Farage bën lëvizjen e papritur, jep dorëheqjen si deputet

Lideri i Reform UK, Nigel Farage, ka njoftuar dorëheqjen nga posti i deputetit për zonën e Clacton, duke shkaktuar mbajtjen e zgjedhjeve të pjesshme, në të cilën ai ka konfirmuar se do të kandidojë përsëri për të kërkuar një mandat të ri nga votuesit.

Në një deklaratë publike, Farage tha se dëshiron që qytetarët e Clacton të jenë ata që do të gjykojnë veprimet e tij, ndërsa e përshkroi garën e ardhshme si një përballje mes “popullit dhe establishmentit”. Ai u shpreh se do të luftojë për të fituar zgjedhjet dhe për të vazhduar, sipas tij, revolucionin politik të nisur nga partia Reform UK.

Ai deklaroi se raportimet e publikuara gjatë fundjavës janë të pasakta dhe pretendoi se hetimi parlamentar po përdoret si një mjet politik kundër tij. Sipas Farage, fondet e marra do të përdoren për të mbuluar kostot e sigurisë personale, duke argumentuar se për vite me radhë ka qenë një nga figurat publike dhe politikanët më të sulmuar fizikisht dhe verbalisht në Britaninë e Madhe.

Farage tha gjithashtu se gjatë dekadës së fundit ka fituar të ardhura nga aktivitetet e tij si autor, ligjërues, komentator dhe investitor, duke shtuar se “të fitosh para nuk është krim”.

Megjithëse dorëheqja e tij çon automatikisht në zhvillimin e zgjedhjeve të pjesshme, kjo nuk do të ndalojë hetimin parlamentar ndaj tij. Sipas rregullave të Parlamentit britanik, nëse Farage rizgjidhet deputet, procedurat hetimore do të rifillojnë pas rikthimit të tij në Dhomën e Komunave.

Analistët politikë e konsiderojnë këtë një lëvizje të guximshme politike, me të cilën Farage synon të marrë një mandat të ri drejtpërdrejt nga votuesit, duke argumentuar se legjitimiteti i tij buron nga mbështetja popullore dhe jo nga institucionet parlamentare. Rezultati i zgjedhjes së pjesshme në Clacton pritet të ketë ndikim të rëndësishëm në klimën politike britanike dhe mund të ndikojë në balancat politike përpara zgjedhjeve të ardhshme të përgjithshme.