Ministri i Jashtëm serb, Gjuriç: Do të hapim zyra konsullore në Shkodër dhe Bujanoc

Serbia dhe Shqipëria kanë arritur një marrëveshje në parim për hapjen e konsullatave në Shkodër dhe Bujanoc. Lajmi është bërë i ditur nga ministri i Jashtëm i Serbisë, Marko Gjuriç.

Në një deklaratë për Radio Beogradin, Gjuriç tha se ka zhvilluar bisedime pozitive me ministrin e ri për Evropën dhe Punët e Jashtme të Shqipërisë, Ferit Hoxha, ku është arritur dakordësia paraprake për hapjen e përfaqësive konsullore të dy vendeve.

“Jam i lumtur që pata bisedime të mira me ministrin e ri të Punëve të Jashtme të Shqipërisë, Ferit Hoxha, me të cilin arritëm një marrëveshje në parim për të hapur konsullatat e dy vendeve tona në Shkodër dhe Bujanoc”, u shpreh Gjuriç.