Letoni: Kulbergs kryeministër mes krizës së sigurisë, surprizë emri nga Libani në kabinet

Parlamenti i Letonisë ka votuar të enjten, 28 maj, për emërimin e Andris Kulbergs si kryeministër i ri, me prioritet kryesor sigurinë dhe masat kundër dronëve.

Parlamenti me 100 vende miratoi qeverinë e koalicionit katërpartiak të Kulbergs me 66 vota pro dhe 25 kundër, duke treguar një shumicë të fortë parlamentare të përbërë nga aleanca e forcave qendër-djathta, konservatore dhe nacionaliste.

Ai shtoi se detyra e tij e parë do të jetë siguria kufitare dhe masat kundër dronëve, përfshirë edhe një mekanizëm kompensimi për dëmet e shkaktuara. Në agjendë janë gjithashtu stabilizimi i buxhetit, zgjedhjet e ndershme, emigracioni, lufta kundër korrupsionit, si dhe vazhdimi i mbështetjes për Ukrainën.

“Ekonomia ecën krah për krah me sigurinë. Pa siguri nuk ka ekonomi dhe pa ekonomi nuk do të ketë siguri”, deklaroi Kulbergs.

Qeveria e re u formua pas incidentit kur dy dronë të devijuar ukrainas goditën infrastrukturën e naftës në Letoni në fillim të majit, duke çuar në dorëheqjen e kryeministres Evika Siliņa.

Kulbergs, ish-biznesmen në sektorin e automobilave dhe ish-kreu i Shoqatës së Automjeteve të Letonisë, hyri në parlament vetëm në vitin 2022, por shpejt fitoi profil si kritik i asaj që ai e quan “korrupsion i legalizuar” në administratën shtetërore.

Në kabinetin e tij bën pjesë edhe ministri i Shëndetësisë, Hosams Abu Meri, me origjinë nga Libani, një gastroenterolog që vazhdon të kryejë endoskopi edhe gjatë mandatit qeveritar, si dhe ministri i Mbrojtjes Raivis Melnis, një oficer karriere që më parë ka shërbyer si këshilltar ushtarak për Ukrainën.

Qeveria e re do të ketë më pak se gjashtë muaj kohë për të zbatuar programin e saj, pasi Letonia pritet të mbajë zgjedhjet parlamentare më 3 tetor.