Argjentina inauguron shtatoren 26 metra të Lionel Messi

 Lionel Messi vazhdon të thyejë rekorde, por këtë herë jo me gola apo trofe. Në Argjentinë është inauguruar një shtatore në nder të kapitenit të kampionëve në fuqi të botës, e cila me lartësinë e saj prej 26 metrash është bërë më e madhja e ndërtuar ndonjëherë për yllin argjentinas.

Monumenti tejkalon një tjetër shtatore të Messit të vendosur në Indi, e cila arrin 21 metra lartësi, duke vendosur kështu një rekord të ri në botën e artit kushtuar futbollistit.

Vepra është realizuar nga një artist vendas dhe është vendosur në një pikë strategjike pranë një prej akseve kryesore rrugore të rajonit Cutral Co, me synimin që të jetë lehtësisht e aksesueshme për turistët dhe admiruesit e futbollit nga e gjithë bota.

Statuja paraqet Messin me fanellën e ekipit kombëtar, në momentin historik kur ngre lart trofeun e Kupës së Botës të fituar në ‘Katar 2022’. Ky imazh është kthyer në një simbol të suksesit më të madh të karrierës së tij dhe një kujtim të paharrueshëm për tifozët argjentinas.

E ndërtuar mbi një strukturë çeliku dhe e veshur me beton, statuja peshon rreth 70 tonë, duke u renditur ndër monumentet më të mëdha kushtuar një sportisti në nivel global.

Përtej vlerës artistike dhe emocionale, projekti synon të ketë edhe një ndikim të rëndësishëm ekonomik. Autoritetet lokale shpresojnë që monumenti të shndërrohet në një destinacion të rëndësishëm turistik, duke tërhequr mijëra vizitorë dhe tifozë të Messit çdo vit.