Paul McCartney bëhet miliarder, i treti në botë mes muzikantëve më të pasur

Legjenda e muzikës britanike, Paul McCartney, ka hyrë në klubin ekskluziv të miliarderëve, me një pasuri të vlerësuar në 1.4 miliardë dollarë. Sipas revistës Forbes, ish-anëtari i Beatles renditet si muzikanti i tretë më i pasur në botë, pas Jay-Z, me 2.8 miliardë dollarë, dhe Taylor Swift, me 2 miliardë dollarë.

Pasuria e tij është ndërtuar ndër vite përmes të drejtave muzikore, koncerteve dhe investimeve. Një rol të rëndësishëm ka kompania e tij MPL Communications, e themeluar në vitin 1969, e cila administron katalogun e këngëve të McCartneyt dhe të drejtat e veprave të artistëve të tjerë. Vetëm këto asete vlerësohen në rreth 250 milionë dollarë.

Një tjetër burim i rëndësishëm të ardhurash është trashëgimia e Beatles. McCartney zotëron 25% të kompanisë Apple Corps, ndërsa përfiton miliona dollarë çdo vit nga të drejtat e autorit për këngët e grupit.

Të ardhurat nga turneu “Got Back”, pronat e paluajtshme në vende të ndryshme dhe koleksioni i veprave të artit kanë kontribuar gjithashtu në rritjen e pasurisë së tij.

Pavarësisht moshës 84-vjeçare, McCartney vazhdon të jetë aktiv në muzikë, duke dëshmuar se suksesi i tij nuk i përket vetëm historisë së Beatles, por edhe një karriere që vazhdon të gjenerojë të ardhura të konsiderueshme.