Itali, protesta masive kundër qeverisë Meloni, përplasje me policinë në disa qytete

Italia është përfshirë nga protesta të gjera, ku dhjetëra mijëra studentë dhe punëtorë kanë dalë në rrugë për të kundërshtuar politikat e qeverisë së kryeministres Giorgia Meloni.

Demonstratat janë zhvilluar në disa qytete të vendit, ndërsa protestuesit kanë ngritur shqetësime për rritjen e kostos së jetesës, pagat, kushtet e punës, financimin e arsimit dhe shëndetësisë, si dhe shpenzimet ushtarake.

Situata është tensionuar në disa zona, ku janë regjistruar përplasje mes protestuesve dhe forcave të policisë. Në Mestre, policia ka përdorur shkopinj gome për të shpërndarë turmën, ndërsa në Vicenza janë përdorur gaz lotsjellës dhe autobotë uji. Sipas raportimeve, tre protestues kanë mbetur të plagosur gjatë përleshjeve.

Protesta janë zhvilluar edhe në Palermo, Milano, Cosenza dhe Torino, ku mijëra qytetarë janë bashkuar në marshime dhe tubime kundër politikave të qeverisë.

Në Torino, organizatorët pretendojnë se në demonstratë kanë marrë pjesë mbi 50 mijë persona, ndërsa në Palermo rreth 2 mijë protestues kanë kërkuar masa kundër rritjes së çmimeve dhe më shumë investime në shëndetësi.

Lëvizja protestuese ka bashkuar studentë, punëtorë, sindikata dhe grupe të ndryshme shoqërore, duke shndërruar pakënaqësinë ndaj politikave ekonomike dhe sociale në një mobilizim të gjerë në mbarë vendin.