Harry Kane fiton “Topin e Artë” 2026, anglezi rikthehet në majën e futbollit botëror pas 25 vitesh

Harry Kane është fituesi i “Topit të Artë” për vitin 2026, duke u bërë anglezi i parë që fiton çmimin më prestigjioz individual të futbollit që prej vitit 2001, kur trofeun e mori Michael Owen. Sulmuesi i Bayern Munich u shpall lojtari më i mirë në botë gjatë ceremonisë së zhvilluar në Londër, duke kurorëzuar një sezon të jashtëzakonshëm me fanellën e klubit gjerman dhe të kombëtares angleze.

Kane ishte protagonist i një sezoni mbresëlënës, duke realizuar 73 gola në 65 ndeshje me Bayernin dhe Anglinë. Me klubin bavarez, ai fitoi titullin e Bundesligës, Kupën e Gjermanisë dhe Superkupën, ndërsa u dallua edhe për paraqitjet e tij individuale, duke fituar gjithashtu çmimin për golashënuesin më të mirë.

Në ceremoninë e zhvilluar në kryeqytetin anglez, sulmuesi 33-vjeçar nuk e fshehu emocionin për këtë arritje të madhe në karrierën e tij.

“Jam pothuajse pa fjalë. Të qenit këtu në Londër e ka bërë këtë ditë edhe më të veçantë. Falënderoj të gjithë ata që votuan për mua. E di se ka qenë një garë e vështirë, duke pasur parasysh numrin e madh të lojtarëve të klasit botëror”, u shpreh Kane.

Ai vlerësoi gjithashtu lojtarët e tjerë të nominuar dhe theksoi rëndësinë e vendosmërisë dhe punës së palodhur për të arritur rezultate të mëdha.

Fitorja e “Topit të Artë” shënon një moment historik për futbollin anglez dhe për karrierën e Kane, i cili pas vitesh të tëra në nivelet më të larta të futbollit europian arrin të marrë vlerësimin më të madh individual të këtij sporti.