Sanchez nën presion, skandalet dhe kriza e strehimit tronditin mbështetjen për socialistët

Në Spanjë, kryeministri Pedro Sánchez po përballet me një periudhë të vështirë politike, mes skandaleve që kanë prekur rrethin e tij familjar dhe politik, pakënaqësisë për krizën e strehimit dhe kritikave për menaxhimin e fluksit të migrantëve në Ceuta.

Në qendër të debatit është edhe slogani i shkruar në një pankartë në Puerta del Sol në Madrid: “Dhe tani, kë të votoj?”. Mesazhi pasqyron pakënaqësinë e një pjese të elektoratit, ndërsa Sánchez përpiqet të rikthejë mbështetjen duke vendosur në qendër të fushatës problemin e çmimeve të larta të qirave.

Kritikat janë shtuar edhe për shkak të personave të tjerë të lidhur me Partinë Socialiste, të cilët janë përfshirë në hetime dhe çështje gjyqësore. Opozita, veçanërisht Partia Popullore dhe Vox, ka përdorur këto raste për të sulmuar qeverinë dhe për të vënë në pikëpyetje mënyrën e funksionimit të saj.

Sánchez ka mbrojtur bilancin e qeverisë së tij, duke theksuar arritjet në ekonomi, politikën sociale, të drejtat e grave dhe përpjekjet për paqen. Megjithatë, ai ka pranuar se qeveria ka bërë edhe gabime.

Ndërkohë, qeveria ka miratuar dy dekrete të reja për strehimin, që përmbajnë 21 masa. Mes tyre janë zgjatja deri në dy vjet e kontratave të qirasë për personat që kanë qenë korrektë me pagesat, kredi pa interes deri në 50 mijë euro për blerjen e banesës së parë dhe lehtësi fiskale për pronarët e vegjël që japin banesa me qira të përballueshme.

Paketa përfshin gjithashtu 280 milionë euro për ndërtimin e banesave me metoda industriale dhe 400 milionë euro për banesa me çmime të kontrolluara.

Dekretet vijnë pasi Kongresi i kishte rrëzuar të premten masat e mëparshme, me votat e Partisë Popullore, Vox dhe Junts. Me parlamentin të shpërndarë, dekretet do të duhet të kalojnë përmes Deputacionit të Përhershëm.

Sánchez e ka lidhur këtë situatë me zgjedhjet, duke deklaruar se nëse shumica parlamentare u kthen shpinën qytetarëve, atëherë duhet të jenë qytetarët ata që vendosin. Fushata elektorale pritet të nisë të shtunën në Sevilje, një nga bastionet tradicionale të socialistëve, ku Sánchez shpreson të rikthejë mbështetjen e humbur.