GJKKO merr vendimin për Metën, ish-presidenti mbetet në burg

Ish-presidenti i Shqipërisë, Ilir Meta, do të vijojë të qëndrojë në paraburgim, pasi Gjykata e Posaçme Kundër Korrupsionit dhe Krimit të Organizuar ka rrëzuar kërkesën e paraqitur nga mbrojtja e tij për ndryshimin e masës së sigurisë.

Avokatët e Metës kishin kërkuar zëvendësimin e masës “arrest në burg” me një masë më të butë sigurie, duke synuar që ish-presidenti të mos qëndronte më pas hekurave gjatë vijimit të procesit gjyqësor.

Pas shqyrtimit të kërkesës, GJKKO ka vendosur të mos e pranojë atë, duke lënë në fuqi masën aktuale të sigurisë.

Në këto kushte, Ilir Meta do të vijojë të mbahet në burg, ndërsa beteja e mbrojtjes për një masë më të lehtë sigurie nuk është pranuar nga gjykata.

Vendimi i GJKKO-së vjen në një moment kur çështja ndaj ish-presidentit vijon të jetë në fokus të opinionit publik dhe institucioneve të drejtësisë.