Kanada do të marrë pjesë në Eurovision 2027

Kanada do të marrë pjesë në Eurovision-in 2027, duke u bërë shteti i parë i ri që i bashkohet garës që nga Australia në vitin 2015 dhe vjen pas një viti të trazuar, ku disa pjesëmarrës të hershëm si Irlanda dhe Spanja u tërhoqën për shkak të pjesëmarrjes së Izraelit.

Hapja e rrugës për pjesëmarrjen e Kanadasë u bë javën e kaluar, kur transmetuesi publik CBC/Radio-Canada u bë anëtar i plotë i Unionit Evropian të Transmetimeve (EBU), organizata që organizon konkursin vjetor.

Edhe artistë të tjerë kanadezë kanë marrë pjesë më vonë, përfshirë Natasha St-Pier, me origjinë nga New Brunswick, e cila përfaqësoi Francën në vitin 2001, dhe La Zarra, këngëtare nga Montreal që përfaqësoi Francën në vitin 2023.

Sipas organizatorëve, Kanadaja do të debutojë në gjysmëfinalet e vitit të ardhshëm në Bullgari.

CBC/Radio-Canada do të publikojë më vonë gjatë vitit detajet se si do të përzgjidhet përfaqësuesi i Kanadasë.

Kanadaja nuk është vendi i parë jashtë Evropës që merr pjesë në konkurs; Izraeli dhe Australia marrin pjesë rregullisht, ndërsa Maroku ka marrë pjesë edhe në vitin 1980.

Qeveria e kryeministrit Mark Carney kishte deklaruar në nëntor se po bashkëpunonte me CBC-në “për të eksploruar pjesëmarrjen në Eurovision”. Buxheti i qeverisë së tij përfshinte 150 milionë dollarë kanadezë (rreth 80 milionë paund) për transmetuesin publik.

Rregullat e Eurovisionit lejojnë pjesëmarrjen e vendeve që kanë transmetues anëtarë të EBU-së.

Deri para së enjtes, CBC kishte statusin e “anëtarit të asociuar”.

“Zëri i Kanadasë në këtë komunitet na bën më të fortë”, tha Noel Curran, drejtor i përgjithshëm i EBU-së.

Mbetet ende e paqartë nëse vendet që bojkotuan edicionin e vitit 2026 do të marrin pjesë vitin e ardhshëm. Irlanda, Islanda, Holanda, Sllovenia dhe Spanja u tërhoqën për shkak të vendimit të EBU-së për të lejuar pjesëmarrjen e Izraelit.

Duke folur para konkursit të këtij viti në Vjenë, drejtori i Eurovisionit Martin Green tha se dera mbetet e hapur për rikthimin e transmetuesve.

“Kemi 35 anëtarë të familjes sonë këtu, dhe kjo mjafton për një festë të madhe. Por na mungojnë pesë dhe i ndiejmë mungesën e tyre”, tha ai për BBC News.

“Kur të përfundojë ky spektakël, do të rifillojmë dialogun dhe do të shohim çfarë do të ndodhë.”

Edicioni i këtij viti u fitua nga këngëtarja bullgare Dara me këngën “Bangaranga”. Si rezultat, Eurovision 2027 do të zhvillohet në Sofje.