Osmani dekoron Kombëtaren e Kosovës

Ndonëse Kosova nuk arriti të kualifikohet në kampionatin botëror duke pësuar humbje ndaj Turqisë, megjithatë lojtarët e kombëtares vazhdojnë të gëzojnë respekt që e kanë sjellë Kosovën deri në këtë pikë.

Presidentja, Vjosa Osmani, ka dekoruar Kombëtaren e Kosovës me Medaljen Presidenciale të Meritave.

“Pavarësisht rezultatit, ju do të mbeteni në piedestalin më të lartë të Republikës sonë për krenarinë që i keni bërë popullit tonë. Prandaj, në emër të shtetit dhe të gjithë qytetarëve të Republikës së Kosovës, ju falënderojmë për gjithçka që keni bërë dhe vazhdoni të bëni për vendin tonë. Kontributi juaj është pjesë e pandashme e historisë sonë sportive dhe mbi të gjitha frymëzim i fuqishëm për brezat që vijnë.”

Medalja iu nda kombëtares për arritjen në fazën finale të kualifikimeve. Kapiteni i Kombëtares së Kosovës, Vedat Muriqi, tha se do të dëshironte shumë që ta udhëhiqte ekipin në Amerikë, duke shtuar se fati ndonjëherë nuk të përcjell.

Në ndeshjen që u zhvillua mbrëmë në Fadil Vokrri në Prishtinë, Kosova pësoi humbje 1 me 0 ndaj Turqisë, duke ndërprerë kështu ëndrrën amerikane të kombëtares së Kosovës për Botërorin.