Lufta në Lindjen e Mesme, çmimet e aluminit në nivelin më të lartë të katër viteve

Çmimet e aluminit në tregjet ndërkombëtare kanë arritur nivelin më të lartë të katër viteve të fundit, ndërsa frika për ndërprerje të zgjatura të transportit në Lindjen e Mesme, si pasojë e luftës me Iranin dhe përshkallëzimit të konfliktit, ka rritur shqetësimet për furnizimin me këtë metal.

Alumini arriti deri në 4.073,50 dollarë për ton, niveli më i lartë që nga marsi i vitit 2022 – periudhë që përkoi me fillimin e luftës në Ukrainë dhe frikën për furnizimet nga Rusia. Më pas, çmimi u tërhoq në rreth 3.386 dollarë për ton.

Konflikti në Lindjen e Mesme ka paralizuar praktikisht trafikun në Ngushticën e Hormuzit, një rrugë kyçe përmes së cilës alumini i prodhuar në rajon transportohet drejt Shteteve të Bashkuara dhe Evropës.

Sipas analistit të kompanisë Marex, Ed Meir, të cituar nga Reuters, vendet evropiane janë veçanërisht të shqetësuara, pasi bllokimi i furnizimeve nga Gjiri Persik vjen në një moment delikat. Një nga furnizuesit e hershëm të aluminit për Evropën, Mozal, pritet të mbyllë aktivitetin e saj gjatë këtij muaji.

Në të njëjtën kohë, rritja e fortë e çmimit të naftës po shton frikën për një ngadalësim të rritjes ekonomike globale dhe një kërkesë më të dobët për metalet industriale. Presion shtesë mbi tregun po ushtron edhe forcimi i dollarit amerikan.