Gjermania rikthen në qendër të debatit shërbimin ushtarak, qeveria miraton modelin e ri të rekrutimit

Partitë e koalicionit qeverisës në Gjermani kanë rënë dakord për krijimin e një procesi kombëtar rekrutimi dhe për objektiva të rinj në forcimin e trupave, në kuadër të një modeli të ri të shërbimit ushtarak vullnetar.

Sipas planit, nëse rekrutimi vullnetar nuk do të sigurojë numrin e nevojshëm të të rinjve për Forcat e Armatosura Gjermane (Bundeswehr), parlamenti do të ketë mundësinë të rivendosë shërbimin e detyrueshëm ushtarak. Në këtë rast, kandidatët mund të përzgjidhen në mënyrë të rastësishme për të plotësuar radhët e ushtrisë.

Koalicioni qeverisës, i përbërë nga blloku konservator i kancelarit Friedrich Merz (CDU/CSU) dhe socialdemokratët (SPD), ka pasur vështirësi për të arritur një marrëveshje mbi mekanizmat që do të zbatohen në rast të mungesës së vullnetarëve. Marrëveshja u prezantua në një konferencë për shtyp ku morën pjesë drejtuesit parlamentarë të CDU-së, CSU-së dhe SPD-së, si edhe ministri i Mbrojtjes, Boris Pistorius.

Modeli i ri ruan parimin e vullnetarizmit, të rëndësishëm për socialdemokratët, por përfshin edhe disa elemente të kërkuara nga konservatorët. Nga viti i ardhshëm, do të dërgohet një pyetësor i detyrueshëm për burrat, ndërsa gratë dhe personat jo-binarë do të kenë mundësinë të përgjigjen në mënyrë vullnetare. Gjenerata e parë që do t’i nënshtrohet detyrimit për kontroll mjekësor ushtarak do të jetë ajo e lindur në vitin 2008.

Ministri Pistorius është shprehur optimist se përmirësimi i kushteve dhe atraktivitetit të shërbimit ushtarak do të ndihmojë në arritjen e numrit të nevojshëm të efektivëve. Ndërkohë, kreu i grupit parlamentar të CDU-së, Jens Spahn, ka theksuar se Ministria e Mbrojtjes do të ketë detyrimin të paraqesë çdo gjashtë muaj një raport në Bundestag mbi ecurinë e procesit të rritjes së forcave të armatosura.

Ky raport gjashtëmujor do të shërbejë si bazë për vlerësimin e nevojës për ndërhyrje të mëtejshme, përfshirë përzgjedhjen me short të rekrutëve ose miratimin e një ligji të ri për rikthimin e plotë të shërbimit të detyrueshëm ushtarak.

Objektivi i qeverisë është që Bundeswehri të arrijë 260 mijë trupa aktive dhe të ketë një rezervë shtesë prej rreth 200 mijë personash.