Fansat e Taylor Swift “pushtojnë” muzeun gjerman për të parë pikturën që frymëzoi “Fatin e Ofelisë”

Një muze gjerman është pushtuar papritur nga fansat e Taylor Swift sepse një nga pikturat aty ka një ngjashmëri të habitshme me skenën hapëse të videos hit numër 1 të Swift, “Fati i Ofelisë”.

Qindra vizitorë shkuan në Hessische Landesmuseum në qytetin qendror gjerman të Wiesbaden gjatë fundjavës për të admiruar pikturën, ku një familje udhëtoi nga qyteti verior i Hamburgut posaçërisht për këtë rast, tha zëdhënësja e muzeut Susanne Hirschmann për Associated Press të enjten.

Midis vizitorëve ishin edhe shumë familje amerikane që janë të stacionuara në një bazë të Ushtrisë Amerikane në Wiesbaden.

Në dramën origjinale, Ofelia, një grua e re fisnike e Danimarkës, përfundimisht çmendet dhe mbytet.

Piktura me vaj mbi kanavacë e Friedrich Heyser paraqet figurën e Ofelisë të veshur me të bardha dhe të rrethuar nga zambakë uji të bardhë. Viti i saktë i krijimit të pikturës nuk dihet, por ekspertët besojnë se daton rreth vitit 1900.

Në skenën hapëse të videos për këngën hit “The Fate of Ofhelia”, Swift luan rolin e Ofelisë dhe shndërrohet në një pikturë të gjallë.

Skena e këngës tregon ngjashmëri me punën e Heyser, tha drejtori i muzeut Andreas Henning për agjencinë gjermane të lajmeve dpa.

Hirschmann tha se ekipi i muzeut e njohu ngjashmërinë në fillim të këtij muaji dhe vendosi t’i ftonte fansat e Swift për një tur të veçantë muajin e ardhshëm. Pasi ata postuan një njoftim për turneun në faqen e tyre të internetit, lajmi për pikturën e Ofelisë shpejt u bë viral në internet.

“Po e shijojmë vërtet këtë vëmendje – është shumë argëtuese”, tha Hirschmann për AP, duke shtuar se të gjithë fansat që do të shfaqen për turneun e 2 nëntorit “‘Ofelia’ e Taylor Swift në muzeun e Wiesbaden” të veshur si ylli i popit ose si “bukuroshja tragjike Ofelia” do të jenë në gjendje të marrin pjesë në turne falas.

Ka vetëm një problem: turi është rezervuar plotësisht, kështu që muzeu mund të duhet të shtojë ture shtesë për të gjithë fansat e Swiftie të fiksuar pas artit.

Henning tha se muzeu është përpjekur tashmë të kontaktojë këngëtaren, por deri më tani nuk ka pasur sukses në lidhje me yllin botëror. “Do të doja shumë t’i tregoja Taylor Swift pikturën origjinale,” tha ai.

“Jemi të befasuar dhe të kënaqur që Taylor Swift e përdori këtë pikturë nga muzeu si frymëzim për videon e saj,” tha Henning. “Kjo është, sigurisht, një mundësi e shkëlqyer për të tërhequr njerëz në muze që nuk na njohin ende.”

Muzeu tha se nuk e di me siguri nëse vepra artistike shërbeu si model për këngën e Swift, e cila aktualisht është një hit numër 1 si në Gjermani ashtu edhe në Shtetet e Bashkuara.