Aktorët e Hollivudit bien dakord me studiot për t’i dhënë fund grevës

Sindikata e aktorëve të Hollivudit arriti një marrëveshje paraprake me studiot e Hollivudit për t’i dhënë fund grevës së tyre disa mujore. Aktorët të cilët u larguan nga puna në mes të korrikut kërkuan rritje të pagave minimale dhe kufizimin e përdorimit të inteligjencës artificiale në prodhimet e filmave.

Drejtuesit e sindikatës argumentuan se modeli i viteve të fundit, që përdor industria përmes platformave në internet, i ka zhvatur aktorët duke i kaluar fitimet që u takojnë atyre tek drejtuesit e lartë.

George Clooney dhe yje të tjerë të kinematografisë kishin shprehur mbështetje për këtë grevë dhe kërkuan një zgjidhje sa më të shpejtë në mënyrë që puna në shumë projkte kinematografke të riniste.

Filma të mëdhenj, duke përfshirë filmin “Mission: Impossible” dhe ribërjen  e filmit të animuar “Borëbardha” nga kompania Disney, u shtynë deri në vitin 2025.