Një stuhi e fuqishme dimërore që përfshin këtë javë Shtetet e Bashkuara, mund të sjellë Krishtlindjet më të ftohta në 4 dekada. Vala e të ftohtit, që sipas ekspertëve vjen një herë në gjeneratë, nisi në veriperëndim të Paqësorit të enjten, para t’i drejtohet lindjes ku do të shndërrohet në një “ciklon bombë”, ditën e premte.
Më shumë se 90 milionë njerëz janë paralajmëruar për mot të keq në 37 shtete. 80 për qind e tyre, pritet të përjetojnë temperatura të acarta disa gradë nën zero, përfshirë edhe shtetet në jugun e largët, të tilla si Teksas.
E pagëzuar si stuhia dimërore Elliot, shpërthimi arktik pritet të sjellë Krishtlindjet më të ftohta për zonën e Midwest, që prej fundit të viteve 80-të. Edhe shteti i diellit, Florida, parashikohet të ketë festat më të ftohta në 30 vite. Stuhia pritet të sjellë erëra të fuqishme dhe reshje të dendura bore, duke vështirësuar kushtet e udhëtimit në prag të Krishtlindjeve.
Shumë kompani ajrore po u ofrojnë pasagjerëve fluturime alternative, në zonat që pritet të preken më së shumti. Qindra fluturime nga Denver në Chicago janë anuluar. Në Denver, termometri shënoi -26 gradë celcius, këtë të enjte, ndërsa Chikago është paralajmëruar të përgatitet për reshje të dendura bore.
Post comments (0)