Listeners:
Top listeners:
play_arrow
LIVE CLUB FM SHQIPËRI
play_arrow
LIVE CLUB FM KOSOVË KOSOVË
play_arrow
LIVE RADIO SHQIP DËGJO SHQIP
play_arrow
LIVE SHQIP POPULLORE Vëtëm Këngë Popullore
play_arrow
LIVE CLUB BAR
play_arrow
LIVE CLUB BAR BIT
today17/11/2026
Tirana përkujton sot 82-vjetorin e çlirimit nga pushtimi gjerman, një prej datave më të rëndësishme në historinë e kryeqytetit. Më 17 nëntor 1944, pas javësh luftimesh dhe sakrificash, forcat gjermane u tërhoqën nga qyteti, duke i dhënë fund pushtimit nazist.
Rruga drejt çlirimit të Tiranës ishte e vështirë dhe u shoqërua me përplasje të ashpra mes forcave partizane të Ushtrisë Nacionalçlirimtare dhe trupave gjermane. Operacioni për marrjen e kryeqytetit nisi më 29 tetor 1944 dhe zgjati 19 ditë, me luftime që u zhvilluan në rrugët, lagjet dhe zonat përreth qytetit.

Në këtë operacion një rol të rëndësishëm patën formacionet partizane, të drejtuara nga komandantë si Mehmet Shehu. Një nga momentet me rëndësi ishte edhe Beteja e Mushqetasë, e zhvilluar më 13 dhe 14 nëntor 1944, e cila ndikoi në dobësimin e pozicioneve gjermane dhe në tërheqjen e tyre nga kryeqyteti.
Pas largimit të trupave gjermane, më 17 nëntor Tirana u shpall e çliruar. Fitorja erdhi pas një periudhe të vështirë, e cila la pas viktima dhe dëme të konsiderueshme, duke u kthyer në një nga episodet më të rëndësishme të historisë së Luftës së Dytë Botërore në Shqipëri.
Vetëm 11 ditë më vonë, më 28 nëntor 1944, qeveria shqiptare hyri zyrtarisht në Tiranë, duke shënuar një tjetër moment të rëndësishëm për vendin në përfundim të luftës.
Sot, 82 vite pas kësaj ngjarjeje, 17 Nëntori përkujtohet në nderim të të gjithë atyre që kontribuuan dhe sakrifikuan për çlirimin e kryeqytetit. Kjo datë mbetet pjesë e kujtesës historike të Tiranës dhe një moment reflektimi mbi rrugëtimin e qytetit ndër vite.

Written by: Neada Mucaj
Copyright Radio Club FM
Post comments (0)