Britani e Madhe, dy iranianë shpallen fajtorë për spiunazh në favor të Gardës Revolucionare

Policia britanike ka bërë të ditur se dy shtetas iranianë janë shpallur fajtorë për spiunazh në favor të Korpusit të Gardës Revolucionare Islamike të Iranit (IRGC).

Policia Metropolitane njoftoi se Mostafa Sepahvand (41-vjeç) dhe Farhad Manesh (46-vjeç) u shpallën fajtorë për spiunazh në favor të Iranit pas një hetimi të zhvilluar nga Njësia e Policisë Kundër Terrorizmit në Londër (CTP).

Objektivat e përgjimit përfshinin dy gazetarë, një avokat dhe një profesionist të prodhimit mediatik, bëri të ditur policia.

“Pas arrestimeve, ekipi hetimor punoi me përkushtim dhe shpejtësi për të përkthyer në anglisht mijëra mesazhe në gjuhën perse dhe më pas përdori të dhënat e antenave të telefonisë celulare për të ndërtuar një dosje bindëse mbi veprimtarinë e përgjimit”, tha në deklaratë Vicki Evans, koordinatore e lartë kombëtare e Policisë Kundër Terrorizmit.

Policia bëri të ditur se përgjimet, zbulimi paraprak dhe kërkimet në burime të hapura u kryen gjatë periudhës nga gushti i vitit 2024 deri në mars të vitit 2025.

Gjatë seancave në Gjykatën Penale të Woolwich u bë e ditur se oficerët e Njësisë së Policisë Kundër Terrorizmit në Londër kishin zbuluar në telefonat celularë të tre personave dokumente informuese, të cilat përmbanin hollësi lidhur me objektivat e përgjimit.