Sekreti i jetëgjatësisë së Putin duket se lidhet me majmunët, çfarë po studion Rusia?

Shkencëtarët në Rusi kanë nisur studime të zgjeruara mbi primatët e moshuar, me synimin për të kuptuar më mirë proceset biologjike të plakjes dhe për të gjetur mënyra që në të ardhmen mund të zgjasin jetën e njeriut.

Projekti u prezantua në Moskë nga Mikhail Kovalchuk, drejtues i Institutit Kurchatov dhe një prej bashkëpunëtorëve të afërt të presidentit rus, Vladimir Putin. Sipas raportimeve të Bloomberg, kërkimet synojnë të analizojnë fazat e ndryshme të plakjes përmes studimit të majmunëve, të cilët kanë ngjashmëri të rëndësishme biologjike me njerëzit.

Shkencëtarët po shqyrtojnë primatë të moshës 18 deri në mbi 30 vjeç, duke analizuar treguesit biokimikë, strukturën e organizmit, si dhe gjendjen e enëve të gjakut dhe trurit.

Kovalchuk argumentoi se studimi i këtyre kafshëve mund të ndihmojë në krijimin e një sistemi për kontrollin e proceseve biologjike që lidhen me plakjen, me synimin për të rritur jetëgjatësinë e njeriut.

Sipas tij, ambientet e Institutit Kurchatov strehojnë mbi 7 mijë majmunë të 22 specieve të ndryshme. Megjithatë, kjo shifër përfaqëson numrin e përgjithshëm të kafshëve dhe jo vetëm ato që janë përfshirë në studimin për plakjen.

Në kuadër të këtij projekti, Instituti Kurchatov po bashkëpunon edhe me Qendrën Kërkimore Ruse të Kirurgjisë Petrovsky për krijimin e një banke me mostra gjaku nga primatë me jetëgjatësi të madhe. Materialet biologjike do të shërbejnë për të studiuar mekanizmat që ndikojnë në plakjen e organizmit.

Interesi për zgjatjen e jetës njerëzore lidhet edhe me Vladimir Putinin, i cili ka shfaqur më herët interes për zhvillimet në bioteknologji dhe mundësitë që ato ofrojnë për zgjatjen e jetëgjatësisë.

Në shtator të vitit 2025, gjatë një bisede me presidentin kinez Xi Jinping në Pekin, një mikrofon i hapur regjistroi diskutimin e tyre mbi mundësinë që përparimet në bioteknologji t’u mundësojnë njerëzve të jetojnë deri në 150 vjet, madje edhe të arrijnë pavdekësinë.

Mikhail Kovalchuk konsiderohet një figurë me ndikim në rrethin shkencor pranë Kremlinit dhe është përshkruar si një nga mbështetësit kryesorë të programeve ruse që synojnë luftën kundër plakjes.

Pavarësisht ambicieve të projektit, studimet janë ende në fazë kërkimore dhe nuk përbëjnë dëshmi se shkencëtarët kanë gjetur një metodë për të zgjatur ndjeshëm jetën e njeriut.