Portugalia në protestë kundër krizës së strehimit, qytetarët ngrenë mbi 100 tenda në sheshet e Lisbonës dhe Portos

Portugalia është përfshirë nga një tjetër valë protestash kundër krizës së strehimit, me qytetarët që janë rikthyer në sheshet qendrore të Lisbonës dhe Portos, duke ngritur tenda dhe duke kërkuar masa urgjente nga qeveria për përballimin e kostove të banimit.

Të martën, më 3 nëntor, kolektivi qytetar “Acampada de Lisboa” organizoi një asamble të përgjithshme në sheshin Rossio, në zemër të kryeqytetit portugez, ku përsëriti kërkesat për masa të menjëhershme ndaj krizës së strehimit.

Deri rreth orës 03:00 të mëngjesit, një pjesë e konsiderueshme e sheshit Rossio ishte mbushur me tenda. Sipas raportimeve, mëngjesin e së mërkurës në këtë shesh numëroheshin rreth 80 tenda, ndërsa 20 të tjera ishin ngritur në një shesh në qytetin e Portos.

Ndërkohë, kryeministri portugez Luís Montenegro reagoi të martën, duke deklaruar se nuk ekziston asnjë arsye për përdorimin e dhunës gjatë protestave.

Ai u bëri gjithashtu thirrje drejtuesve të opozitës që të paraqesin propozimet e tyre konkrete për zgjidhjen e krizës së strehimit gjatë së enjtes, më 5 nëntor.

Nga ana tjetër, protestuesit kanë sinjalizuar gatishmëri për dialog institucional. Anëtarët e kolektivit “Acampada de Lisboa” votuan për të pranuar ftesën e presidentit António José Seguro për bisedime, megjithëse ende nuk është përcaktuar një datë për zhvillimin e takimit.

Kriza e strehimit është kthyer prej kohësh në një nga sfidat kryesore sociale dhe ekonomike të Portugalisë. Rritja e çmimeve të pronave dhe qirave, veçanërisht në qytetet e mëdha, ka shtuar presionin mbi familjet dhe të rinjtë që kërkojnë të sigurojnë një banesë.