Ben Stiller takon Zelensky-n: Ju jeni heroi im

Aktori i Hollivudit dhe ambasadori i vullnetit të mirë i Kombeve të Bashkuara, Ben Stiller e ka konsideruar Presidentin ukrainas, Volodymyr Zelensky si heroin e tij, gjatë një vizite në Kiev.

“Ajo çfarë keni bërë, mënyra si keni mobilizuar shtetin, botën, është vërtet inspiruese”, ka thënë ylli amerikan 56-vjeçar, duke iu referuar fjalimeve të Zelenskyt para parlamenteve në gjithë botën.

“Është nder i madh për mua ju jeni heroi im”, ka thënë Stiller, i cili u emërua ambasador i vullnetit të mirë i OKB-së më 2018.

Të dy kanë folur edhe për karrierën që kanë pasur si aktorë të humorit.

“Ju keni hequr dorë nga një karrierë e mrekullueshme”, i ka thënë Stiller, Zelenskyt.

“Jo aq të mrekullueshme sa e juaja”, i është përgjigjur ai.

Më herët Stiller vizitoi qytetin e shkatërruar të Irpin në Ukrainë dhe bëri thirrje për dhembshuri si dhe mbështetje për të gjithë refugjatët në mbarë botën.

Qyteti afër Kievit u bë skena e luftimeve të ashpra menjëherë pasi Rusia sulmoi Ukrainën më 24 Shkurt.