Johnny Depp fiton gjyqin kundër ish gruas Amber Heard

Johnny Depp ka fituar gjyqin kundër ish gruas së tij, Amber Heard. Pas tri ditësh diskutim, juria vendosi në favor të aktorit duke i dhënë 15 milionë dollarë dëmshpërblim. Depp paditi ish partneren për shpifje pasi akuzohej se kishte ushtruar dhunë ndaj saj.

Heard u shpërblye me 2 milionë dollarë në kundërpadinë e saj kundër Depp. Depp nuk ishte i pranishëm pasi ishte në Britaninë e Madhe në turne me legjendën e kitarës Jeff Beck. Amber Heard tha në një deklaratë pas vendimit: “Zhgënjimi që ndjej sot është përtej fjalëve.

Një mal provash nuk ishin të mjaftueshme për t’i bërë ballë fuqisë, ndikimit të ish-bashkëshortit tim. Jam shumë e zhgënjyer. Është një kthim pas. Unë besoj se avokatët e Johnny-t ia dolën mbanë që juria të anashkalonte çështjen kyçe të lirisë së fjalës dhe të injoronte provat që ishin aq bindëse sa fituam në MB.

Më vjen keq që e humba këtë çështje. Kam më e trishtuar sepse kam humbur të drejtën që mendoja se kisha si një amerikane – të flas lirshëm dhe hapur”, tha aktorja. Depp e paditi Heard-in për 50 milionë dollarë për një artikull të botuar në The Washington Post në dhjetor 2018.

Ajo pretendonte se ishte “një figurë publike që përfaqëson abuzimin në familje”. Në fund të gjyqit 6 javor në Virxhinia, ekipi ligjor i aktorit i kërkoi jurisë “t’i kthente jetën Depp”, duke thënë se çështja nuk kishte të bënte me paratë, por me reputacionin dhe “lirimin nga burgu në të cilin ai ka jetuar 6 vitet e fundit”.

Gjatë gjashtë javëve të gjyqit, juria dëgjoi miqtë – duke përfshirë supermodelen Kate Moss – anëtarët e familjes, mjekët, terapistët dhe stafin në të kaluarën dhe të tashmen, të cilët punuan dhe kaluan kohë me ish-çiftin. Depp dhe Heard dëshmuan gjithashtu.