Lajme


Nisin nesër “Lojërat Olimpike”, Shqipëria do të parakalojë e 12-ta në ceremoninë hapëse

Postuar nga admin

22nd July 2021



Shqipëria do të parakalojë në vendin e 12-të në ceremoninë hapëse të Lojërave Olimpike, e cila do të nisë në orën 13:00 shqiptare. Në Rio 2016, kuqezinjtë ishin të katërtit, teksa zbritja më poshtë në paradë vjen bazuar në alfabetin japonez. Flamuri shqiptar do të shfaqet në stadiumin Olimpik të Tokios pas atij të Arubës dhe përpara Armenisë.

Sportistët shqiptarë që do të garojnë në lojërat olimpike janë Luiza: Gega, Briken Calja, Erkand Qerimaj, Izmir Smajlaj, Nikol Merizaj, Kledi Kadiu, Manuela Delilaj, Indrit Cullhaj, Matvei Petrov.

Sipas traditës, e para në Olimpiadë do të marshojë Greqia, e ndjekur nga ekipi i refugjatëve dhe atletët rusë që garojnë nën flamurin e komitetit olimpik, pas përjashtimit të vendit prej skandalit të dopingut.

Si vend organizator, Japonia del e fundit në paradë, ndërsa përpara tyre do të jenë Franca dhe Shtetet e Bashkuara, të cilat do të mirëpresin Lojërat në Paris 2024 dhe Los Angelos 2028. Në ceremoninë hapëse në Tokio pritet të jenë të pranishëm mbi 11 mijë atletë nga 206 shtete të ndryshme.